La Moo Moo' s Steak and Fries (已改名) 查看

又到聖誕！梗係要搵一間有氣氛嘅餐廳慶祝吓。呢間餐廳係高樓入面，餐廳內較暗，配上火爐嘅視覺效果、聖誕裝飾，好有節日嘅浪漫感覺，特別適合情侶嚟拍拖。Set dinner有紅湯，每一碗入面都一定有一舊牛腩，個湯好足料！蕃茄同蔬菜味好濃郁，有蔬菜嘅碎粒，好有口感！沙律方面，配上芝士碎同脆麵包粒，菜好新鮮好爽口，流心蛋亦都好香！嚟到呢度都仲未到主菜，仲有麵包。麵包又暖又脆；個人本身好熱愛玉桂味，佢有肉桂同牛油，比起一般餐廳又更有層次。紐西蘭安格斯肉眼扒終於出場啦！因為朋友比較唔食得生，所以叫咗七成熟。塊扒好厚身，面頭煎到有啲炭香味，熟得來依然好夠肉汁，帶少少肥膏，但一啲都唔油膩，反而好香口。伴碟嘅蔬菜亦都唔馬虎，好爽甜，好喜歡佢嘅幼薯條。總括而言，無論環境定食物，都令人有滿足的一晚。