俺流塩らーめん (新都會廣場)

營業中

休息中

之前去過屯門分店試過唔錯，所以葵芳見到就試多次，但估唔到佢咁多人要排長龍。好彩我係食自己，所以唔駛等好耐就有位啦！不過咁啱人多，就要坐中間嘅 bar 枱（好過坐扶手電梯樓下，俾一堆陌生人人望住食嘢好尷尬）。試過佢嘅鹽湯，咁我一於食熟成湯底。而且見到好多人都大讚炸雞，所以柯打咗個男盛拉麵。咁就一次過滿足晒我嘅所有願望，仲要係人氣推介嚟架，同埋係最貴果碗！呢個拉麵有齊晒炸雞，叉燒同溫泉蛋，咁我就唔駛自己加配料啦！湯底方面，熟成湯底明顯比鹽湯杰身，味道豐富得嚟亦唔會好鹹，係我幾欣賞嘅！你知啦，食拉麵最重要係個湯底呀嘛。而我最期待嘅炸雞就麻麻地，浸咗落湯有啲淋淋哋。如果可以分開上就好啦，或者另點小食可能會好啲。炸雞外皮雖然淋淋哋，但不得不提雞肉仲係多汁係滑嘅，同埋係好大件。其實真係幾大碗，每次食完都好飽，其實以 $88 呢個價錢真係算唔錯。下次有機會，真係要叫多幾個朋友仔一齊試下新小食。