九井壽司 (已結業)

話說之前喺附近返工，見到呢間九井壽司用新幹線列車做主題幾得意，想試好耐但一直冇機會，今次終於約到朋友陪我一齊食。不論係餐廳既裝潢，定係送食物既「列車」都match返主題，真係會令到我地好似身處喺新幹線列車咁，好得意，如果帶小朋友黎食，一定會好中意。我地一坐落就瘋狂叫野食，因為我地真係好餓😂 呢度係用平板落單的，食咩就禁咩，好方便。而且每order四樣食物就有次抽獎機會，我地就抽中咗蟹柳手卷！叫咗好幾款壽司，三文魚、八爪魚、帆立貝、牡丹蝦等等。個人最中意三文魚同牡丹蝦壽司，三文魚新鮮又厚切，牡丹蝦大隻又鮮甜。另外仲咗特色海膽、特色香蔥吞拿魚碎、芥辣八爪魚軍艦等。估唔到兩款特色都幾好味，一啲都唔會腥，海膽仲好鮮甜。剌身方面，見到隔離枱叫咗蟹鉗，睇落幾吸引，我地都唔執輸叫咗份，幾鮮甜。熟食方面，叫咗唐揚雞、燒芝士餃子雞翼、蟹肉忌廉薯餅。雞翼怪表示最愛燒芝士餃子雞翼，外層燒得香脆，入面好足料，食到好重芝士味。飲品梗係揀波子汽水啦！