樂天皇朝 (利舞臺廣場) (已搬遷) 新店位置

去利舞臺揾食，見到一間叫樂天皇朝嘅食肆，孤陋寡聞嘅我仲以為係韓國嘢，原來係新加坡過江龍。店員話今日係第一日試業，真榮幸!裝修高級，但價錢同一樣係新加坡過江龍嘅翡翠拉麵差唔多。侍應殷勤，但略嫌解說有時過於長氣，亦有略嫌生手嘅時候，試業嘛，可接受嘅。招牌菜八色小籠包，個人只對原味有興趣。皮薄，肉鮮，汁多，但略嫌汁肉比例過多，好似得好少肉淨食湯包咁。牛肉麵，湯底濃郁，非常對辦，牛肉夠淋夠入味但肥肉偏多。可惜麵切得長短不一，偶然有黐埋ㄧ舊嘅麵餅，不過試業嘛…菜肉雲吞一般，湯底偏肥但味偏淡。甜品桂花檸檬蘆薈，不算突出。考慮到試業因素，呢度整體質素應屬中上。不過今晚顧客唔多，將來多客時能否保持質素先係關鍵。何况頭啖湯已被飲乾飲淨，而家加入戰團，要突圍必須努力。