餐廳內外
餐廳唔算大間，而且長期多人幫襯，座位編排都比較密，舒適度較低。
食物選擇
真係花多眼亂，選擇多到填滿兩面A3 size既餐紙，價錢全部都好親民，店員仲告知9:00pm後原來每人送飲品同糖水，真係十分抵食。
沙律 ----魚生碎配蟹籽沙律 $65
次次黎都會點，一定要點重量級！因為超超超級大碗，應該用大煲黎形容至岩，直情用好似整蛋糕打蛋果啲大器皿裝住，一定係2個人share。有大量青瓜絲、蟹柳絲、蟹籽，沙律醬份量適中，最怕太多沙律會好膩同每啖只食到沙律味，呢到唔會，青瓜絲佔最多，魚生碎唔算太少，整體味道正常，以份量取勝！
鮮帶子壽司 $13
件件壽司都係Mega Size！又係超大件，鮮帶子食落都嫩喉冇渣。
三文魚壽司 $13
唔止飯係Mega Size，魚生都大大一片，食落都唔會霉口，質素正常。
油甘魚壽司 $15
望落就比較冇咁新鮮，魚油香欠奉，較失色。
燒鰻魚壽司 $21
見到人地既鰻魚壽司十分吸引，所以又嗌黎試下，長到掂哂碟，同一隻手掌咁大件，燒得好靚，食落有油甘香，必點！
蒜蓉焗半殼蠔 $29(2隻)
有芝士、北海道或者蒜蓉焗蠔，全部都係$79/6隻、$29/2隻，又係好抵食。蒜蓉夠多，蠔唔會焗到乾，仲幾juicy，以呢個價錢絕對收貨！
奉送飲品及糖水
糖水係紫米露，偏甜，但都可以接受，而且係送既已經好滿足。
總括而言，「一番」真係大件夾抵食，而質素唔會令人失望，性價比十分高，宵夜時段仲送飲品同糖水，呢個價位既日本餐廳再加做到同價錢相應食物質素真係唔多，難怪店內長期高朋滿座，唔止Lunch，我都會多啲宵夜時段黎！
