佛手柑素食 (已結業)

最近食太多肉覺得好唔健康，身體都變差了。依排都想食下齋，等自己身體refresh一下！今日專登入太子搵呢間新開嘅素食。餐廳播放住心經嘅純音樂，成個環境都好舒服，聽住音樂，有種好洗滌心靈嘅感覺！牆上面仲有一幅「般若波羅蜜多心經」，老闆話係逐隻逐隻字貼上去，非常有heart！食飯嘅時候，可以望吓牆身嘅心經，再聽住心經純音樂，心情相當平和。一坐底我哋先點了盅足料素湯，個湯完全冇味精，入面有節瓜、蟲草花、竹生等，真係名符其實好足料！我哋點左三款小菜，包括咕嚕素肉、水煮牛肉和輕煎腐皮卷。三款都令人相當驚喜！我最愛係咕嚕素肉，味道同平時食嘅咕嚕肉幾乎一模一樣！外層香脆，醬汁甜甜酸酸好開胃，素肉亦都好有口感，非常好味！水煮素牛肉好惹味，麻麻辣辣，湯底唔會好油，仲好味到可以飲埋！素牛肉質感幾好，同真嘅肉都幾似！入面仲有菇菌、芽菜等，吸晒啲麻辣汁，正呀喂！ 輕煎腐皮卷外皮煎得夠香，裏面主要係蘿蔔絲，點埋自家製嘅甜酸醬食，味道立即提升！最後叫埋甜品 - 即撞豆腐花，新鮮滾熱辣，真係即點即撞架！豆味好濃，而且好滑好香，嚟到必試！