磊犇 (已結業)

今日係旺角行街，就去左試一試熱石牛扒，唔洗等位就有得入，餐廳都唔算好多人。我同朋友佢叫左一個牛肩肉300g同埋一個西冷200g，總共$238。餐廳亦有提供自助區，可以自己攞沙律、飯、麵豉湯，亦有泡菜，比較少見。兩塊牛都好厚切，牛肩肉就比較軟身，容易咬，口感相當唔錯，而且唔會好多筋或者好肥，淡淡肉好正。而個西冷就無咁軟身，但係勝在牛味比較重，同埋會瘦少少無咁肥，都好好味。至於個生熟度就可以自己透過熱石調整，符合自己口味就OK。