影片
更多
2019-01-25
64 瀏覽
工作令人沮喪，唯有以食減壓。對呢間鋪頭嘅背景冇乜認識，淨係知道灣仔銅鑼灣天后附近有幾間分店，好似話北角有間老店但唔同名叫新光。識得將舊式嘅燒臘茶餐廳重新包裝上市，應該都係有人入股搞搞新意思，或者係店二代後生仔嘅新主義，特別喜歡佢嘅招牌，好有一份將老店翻新但仍然保留本來味道嘅感覺。無論如何，乜嘢包裝都係假，最緊要係味道！有乜嘢可以刺激到一個人叫一碗成百蚊嘅燒鵝瀨粉，當然係工作壓力啦！而今次亦係小弟人生裏面第一次食燒鵝髀瀨（之前亦冇咁樣食過燒鵝髀飯），但以前如果係叫成隻燒鵝，就當然食過燒鵝髀啦。夾起一件一口咬落去，心裏面真係嘩一聲出咗嚟！脆！好脆！塊皮咬落去真係脆卜卜，口感唔算好熱，所以冇理由係啱啱出爐，但仍然維持到脆卜卜嘅口感，堅係正！！鵝肉非常鮮嫩多汁，但鵝肉味唔算太濃，而且醃料嘅味道亦屬於輕手，香料亦唔算多，如果喜歡濃味嘅人可能會覺得偏淡唔夠味，但我反而覺得ok，當細心再食真啲嘅時候，就食到有一份好特別嘅味道，諗完又諗，究竟係乜嘢味道呢？最後諗起係類似煙燻嘅味道，後來再睇返佢餐枱上嘅介紹，聲稱係自家嘅荔枝柴煙熏味道技術，嗱！佢話係「技術」，所以究竟係咪真係用荔枝柴嚟煙燻，就不得而知啦
7 瀏覽
0 讚好
0 留言
有乜嘢可以刺激到一個人叫一碗成百蚊嘅燒鵝瀨粉，當然係工作壓力啦！而今次亦係小弟人生裏面第一次食燒鵝髀瀨（之前亦冇咁樣食過燒鵝髀飯），但以前如果係叫成隻燒鵝，就當然食過燒鵝髀啦。
夾起一件一口咬落去，心裏面真係嘩一聲出咗嚟！脆！好脆！塊皮咬落去真係脆卜卜，口感唔算好熱，所以冇理由係啱啱出爐，但仍然維持到脆卜卜嘅口感，堅係正！！鵝肉非常鮮嫩多汁，但鵝肉味唔算太濃，而且醃料嘅味道亦屬於輕手，香料亦唔算多，如果喜歡濃味嘅人可能會覺得偏淡唔夠味，但我反而覺得ok，當細心再食真啲嘅時候，就食到有一份好特別嘅味道，諗完又諗，究竟係乜嘢味道呢？最後諗起係類似煙燻嘅味道，後來再睇返佢餐枱上嘅介紹，聲稱係自家嘅荔枝柴煙熏味道技術，嗱！佢話係「技術」，所以究竟係咪真係用荔枝柴嚟煙燻，就不得而知啦，哈哈！但無論如何，嗰度煙燻嘅味道，實在係將整隻燒鵝髀味道嘅層次提升咗一級，以前就聽人講得多，今次真係第一次食到呢種味道，令人念念不忘。另外，就係佢枱上面有一支任你唧嘅酸梅醬，對於我呢啲酸梅醬控，係一大喜訊！
好啦，最後講下碗瀬粉，最好味係個湯，好香濃，嗰份入口嘅香甜味，實在令你想成碗飲晒，而事後可以通過口渴測試，冇乜口渴嘅感覺，睇嚟都唔算有太多味精。瀬粉都正，口感非常柔軟。
好啦，最後嘅最後，必須要帶返個頭盔先，佢有幾間分店，今次嚟銅鑼灣呢間，同埋食六點鐘左右時段，唔知有冇關係架，但我覺得今次隻燒鵝髀真係一隻神級燒鵝髀，其他分店、其他時段，就唔知啦！祝你好運食到隻咁脆嘅燒鵝髀啦！
張貼
