地點：灣仔廈門街
菜式：日本菜
餐牌：午餐餐牌有多款熱食同壽司刺身，包前菜，日式蒸蛋，日本素面同甜品。
壽司14貫定食 $538 另加一
而家呢個壽司14貫定食晚市都有得食！
日式蒸蛋用塊木板墊住上枱，面頭加有好厚身既松葉蟹肉芡汁，蒸蛋好滑，加有日式魚蛋片同冬菇，味道鹹度適中，唔會太淡。
師傅開始表演之前先show show盒魚生比我睇。
食壽司之前先食前菜，分別有麵豉醬漬蒜頭同牛蒡，伴有酸薑片。牛蒡爽脆。麵豉醬漬蒜頭好特別，濃濃麵豉醬原來配蒜頭係好夾。
春子鯛
第一貫係春子鯛，壽司飯已經加左日式芥末，面頭加有靜岡黃柚子皮，紫蘇花同酸汁。魚肉新鮮，口感爽嫩，食落帶有清新柚子味同酸汁，作為第一貫壽司開胃唔錯。
真鯛
第二貫係真鯛，師傅已經加左豉油同日式芥末，魚肉味道鮮甜d。
北海道帆立貝
第三貫係北海道帆立貝。面頭加有竹炭鹽同青檸汁。帆立貝非常鮮甜爽口，而青檸汁令件壽司味道好清新。
靜岡地金目鯛
第四貫係靜岡地金目鯛。師傅話係金目鯛當中最高級，油份比較重，火炙左更香。食落口感鮮嫩之餘仲帶油香，好味呀！
甜蝦
第五貫係甜蝦。打孖上甜蝦面頭滴左自家炸蝦油，所以食到好香蝦油味，而蝦肉鮮甜黏口，好味道。
鰆魚
第六貫係鰆魚，即係馬交魚。火炙完魚香四溢。師傅係面頭加上白蘿蔔蓉，食落淋身香口d。
三文魚籽
第七貫係三文魚籽。三文魚籽超級鮮美，味道鹹香，喺把口爆出黎。而紫菜超鮮脆，面頭加上少少柚子皮可以平衡鹹度。
伊佐木
第八貫係伊佐木。師傅話整左短期熟成比我，短期熟成即係熟成十幾廿分鐘就整得，加左昆布味醬汁，食落鮮嫩帶少少鹹香，為呢種白身魚加添特別味道。
馬糞海膽
第九貫係馬糞海膽。入口即化馬糞海膽又鮮又creamy，絕對唔會腥，質素絕對高級，入口帶少少冰凍口感，而配超脆紫菜絕對係滑中帶脆，好正。
梭子魚
第十貫係梭子魚，火炙過所以面頭燶燶地，切割得好靚，面頭加上白芝麻粒同少少辣蘿蔔蓉，魚肉好淋而火炙味香。
真池魚
第11貫係真池魚，來自京都，加左蔥花同薑蓉，令到魚生更香，呢貫壽司都唔會腥。
腦天
第12貫係腦天，即係吞拿魚頭既肉，加上醬油之後輕輕炙燒過，食落魚油豐富，入口即溶，好滿足。
螢光魷魚
第13貫係螢光魷魚，係時令魚，當造期係三月到五月，今日難得食到。魷魚非常黏口，真係異常新鮮，加上少少蔥花都唔算太腥，味道濃郁，口感好正！
鯖魚
最後一貫係鯖魚，面頭加有一片白昆布，再加上紫蘇葉。味道係魚油加清香紫蘇葉，好正。
蝦油素面
壽司之後就到蝦油素面。蝦油素面細細兜，一口白色幼身素面唔會太飽，個湯好清，加有少少蝦油，夠味之餘又唔會太油膩。
柚子雪芭
最後一球清新柚子雪芭一清味蕾！
呢餐食足個半鐘有多，上菜速度適中，食完都覺得飽。總括而言，魚生質素高，師傅細心講解，好健談。呢個價錢食到14貫omakase都好抵！入面座位有8個，想食就提早訂位好，雖然位置位於內街，平日晚市都滿座。
