避過一大堆企街sales之後，黎到呢間應該都唔少人去過既後街既樓上放題 - 組長~ 雖然位於鬧市，但係價錢絕對夠大眾化，而且上到去雖然人多，但又唔會覺得唔好坐，第一印象已經不錯!
嘢食種類算係多，但係就冇乜話太特別/突出既款式，都係以大路嘢為主。店員既服務態度唔錯，而且都幾有效率，可能因為地方唔大一眼望晒，基本上一舉手就會有人埋黎
由於都係諗住食生嘢為主，所以今次反過來叫咗熟食先，之後再清一色食生嘢，好似唔洗溝溝埋埋會好啲~ 叫咗少少天婦羅啦、串燒啦、羊架之類，賣相都幾唔錯既，特別係海蝦串，睇見都想食
而且食落又真係夠晒新鮮，蝦味仲好重添! 至於雞翼亦都好入味，不過表皮就唔夠燶，如果再燶少少會更加香口惹味! 天婦羅都一樣係唔錯，特別係茄子，顏色好靚，而且唔會太厚粉 不過羊架就認真唔得
韌到無朋友
仲有個蜆，味道OK既，但係有沙....
不過今餐既主角始終都係刺身! 咁既價錢黎講，其實自自然然個expectation都會低番啲，但係又估佢唔到，呢度既刺身質素真係好唔錯喎，係就係冇象拔蚌、帶子、海膽之類貴價嘢可以嗌，但係佢既刺身大大片之餘仲好新鮮，睇得又食得
特別係三文魚啦~ 而且佢既切法好似同平日食開唔同，每件都切到少少三角形咁款，肉質鮮嫩軟滑，仲冰碎lon住，正呀!
