扒王之王 (已結業)

今日又去咗沙田，同事又帶我去搵嘢食，嚟到扒王之王，而家扒王之王分店已經唔多，原來呢度食lunch都幾平，而且好多選擇。未試過食lunch有餐廳俾咁多選擇你，因為通常要夠快，廚房唔會預備咁多餐牌畀你揀，見到咁多選擇，已經好開心！ 揀咗極黑豬扒配雞扒飯$58，餐飲熱咖啡，餐湯紅湯。餐包先上，熱辣辣軟綿綿的，口感好，食得又開心。餐湯揀咗紅湯，喜歡羅宋湯，裏面有什菜，感覺健康啲。用料充足，洋蔥蘿蔔唔少得，煮到出曬味，羅宋湯微酸，飲完好開胃。見到分量都唔算少，豬扒同雞扒大小差不多，看似細塊，但因為厚身，所以感覺都幾抵食，有豆角，粟米，甘筍做配菜。雞扒好厚肉，形狀又切得靚，果然係扒王之王。外面香煎過，所以皮有少少脆，肉質嫩滑，最緊要厚身啖啖肉，又有肉汁，雞扒超推介！豬扒就唔係想像中咁特別，邊位有筋，但其他部分豬扒肉都好爽口，煎得都唔乾，幾好食，比雞扒薄身小小，但都比起其他茶餐廳算大塊。餐飲熱咖啡，淡咗啲，唔夠咖啡味，可以濃番少少就更加好。