吉列牛忌廉烏冬專門店 (百樂中心) (已結業)

人氣吉列牛專門店－午市有定食套餐，可以試晒佢出名嘅吉列牛同咖哩忌廉烏冬，以優惠價配特飲。餐廳用QR code點餐好方便，上菜迅速。吉列牛嚟到時仲係粉嫩嘅狀態，放上熱石板燒到自己喜好嘅生熟程度，牛肉係少肥嘅部位但肉味夠香，脆口嘅外層令吉列牛更有口感，點蒜味沙律醬、燒肉汁或者芥末都一樣好味，送飯一流。咖哩忌廉烏冬係日式咖哩嘅味道，彈牙嘅烏冬上鋪滿綿滑嘅忌廉，食食下忌廉會同咖哩汁融合一齊，creamy滑溜好滋味，仲有啲肉粒同雜菜雜菇添。雞軟骨餃子冇想像中嗰種雞軟骨嘅爽脆口感，不過餃子皮就好香脆，點埋醬汁趁熱食唔錯。兩杯特飲都係酸酸甜甜嘅果味梳打，夏天飽餐一頓後飲番杯係幾清新。