升哥點心 (已結業)

我鍾意歎一盅兩件，朋友話元朗有間《升哥點心》頗有特色，咁啱今日入元朗做嘢，所以專誠到呢間位於鳳琴街嘅點心小舖試試。街坊小店，面積不大，不過地方乾淨企理。坐低叫茶，天氣咁熱，我見加$10可以揀桂花蕎麥茶，咁就叫個嚟清清心火，潤一潤先，然後再慢慢歎點心。呢度除咗點心之外，仲有燉湯、蒸飯同甜品等多款食物選擇。先嚟個升哥蝦餃皇$30，咬開見大大隻蝦，皮薄餡靚，味鮮料足。跟住試試新口味，來個西紅柿春卷$24，熱辣辣炸好即上，賣相非常精緻，餡料除蝦外，再加上一點點蒜片和新鮮的小紅茄，口感清新豐盈 ; 咁有創意，我鍾意。再來是沙嗲金錢肚$23，牛肚炆得夠入味，沙嗲滋味濃郁，讚!別有洞天脆皮腸$35，類似傳統炸兩，不過釀入蝦肉、馬蹄、粟米、蟹籽等豐富材料，一口咬落，酥脆之餘又兼具多重滋味，別具特色。最後來個甜品利賓納蘆薈水晶果凍$18，做成玫瑰花模樣，小小一個好可愛。咬落有一小粒蘆薈，清新可口。呢度除咗傳統點心外，仲會搞搞新意思，創造一些別饒創意的新派點心。咁有心嘅地道小店，我一定會再嚟支持！