由和富行上去堡壘街
上到去堡壘街就係想食呢間麥記美食
細細地一間手工上海包點
已經係連續幾年必比登餐廳
有好多必比登餐廳拎左一兩年就收檔
呢間麥記直到今年都仲係名單之內
另外北角仲有間叫小老板
都係麥記太子女兩夫婦開既
門口就貼晒餐牌出黎
2
真係平民價黎
但係度買野同食野就無乜規矩
佢就無指定人龍排隊
亦都無收銀位呢樣野
總之就排左條唔知有無用既隊
老闆忙完就會同你落單
比完錢又唔會有單或者號碼
只靠人面識認
有d人叫呢樣野做人情味
但我自己就唔太鍾意呢種模式
而座位亦都只有舖頭出面搭出黎檯仔
衛生環境就好差
當日座位亦都比班工人姐姐霸L晒
所以只可以拎開係一二邊食
不過老闆記性都幾好既
見佢都記得晒邊個買左D乜野
食物都唔會等太耐
前後都唔洗十分鐘
小籠包就應該係等最耐既
如果堂食佢仲會跟埋個蒸籠出黎
廿六蚊四個
比豆漿大王仲平
賣相亦都靚仔好多
不過佢地唔多湯汁
食落都只係一般
仲叫左生煎包同鍋貼
兩樣都係十蚊三件
即叫即整
手工野呢個價真係認真無得輸
試過係元朗國買都要兩倍價錢先食到
熱辣辣夠足料
鍋貼同生煎包皮雖然有d厚但幾好咬口
有肉汁
比小籠包好食
本身仲想試埋個擔擔麵
但真係食唔落
雖然地方污污糟糟
但咁既價位同質素真係日日黎食都可以
不過地方就唔算好方便
堡壘街呢頭都幾黃
連食齋既都有
中菜西餐乜都齊
今晚又會再番黎食飯
