四海魚村 (已結業)

呢幾日天氣開始熱，對於我哋呢啲鍾意食辣嘅人嚟講，天氣熱去食麻辣別有一番風味，呢日我哋就嚟到深水埗北河街呢《四海魚村》川菜館食麻辣。餐廳格局方正，十分光猛，座位坐得舒服。餐牌上都有幾多選擇，我哋揀咗重慶烤鯇魚及麻辣口水雞，落單時侍應話這這兩款菜式可以指明 “麻” 同 “辣”嘅程度，都幾體貼。重慶烤鯇魚 (大邊$208) - 跟有明爐上枱，一路食一路加熱，越食越入味。鯇魚非常新鮮，肉質爽滑有光澤，湯底配料豐富，除咗一般麻辣香料外，仲加有爽脆嘅蓮藕片、海帶及大豆芽，令口感更加豐富。麻、香、辣、鮮俱全，真係聞到已經流口水。麻辣口水雞 ($58) - 醬汁夠麻夠辣，味道豐富有底蘊，雞肉嫩得嚟有雞味，而且斬得薄身，可以令到每一啖雞肉上面嘅醬汁比例更多，食落更加滋味。白飯 ($10) - 有咁惹味嘅菜式，真係白飯都要添多碗。青島啤酒 ($28) - 食麻辣又點少得佢。