大井町日式放題 (已結業)

英皇娛樂廣場自從改咗名之後，其實我都少去咗，不過原來唔講唔知3樓開咗一間新嘅日本放題餐廳叫做大井町。一入到去同朋友坐卡位，見到有各式各樣嘅落單只起碼超過10張，真係食品、飲品包羅萬有。係等嘢食嘅期間，我同朋友行咗出去自助吧嗰度，見到嗰度嘅甜品同埋飲品，真係嚇親！大大支支裝嘢飲可以任攞，仲有我最愛既玄米茶，水溫都好熱，正呀。另外仲有各式各樣嘅甜品、蛋糕，當然唔少得我哋最鍾意食嘅水果。啲嘢食終於到啦！刺身好新鮮，不過叫嘅數量同出單嘅數量有啲分別，明明叫10片但係得五片，職員應該係擔心我哋兩個女仔食唔晒啦！不過我地係大胃王，最後清晒。另外仲叫咗海膽壽司，海膽手卷，啲海膽都好有海水味屬於新鮮。炸物方面有叫咗幾款嘅天婦羅，雞翼同埋八爪魚丸。全部都幾好食，唔會好油。仲有叫咗個炒雜菇、羊架等等。炒雜菇好香，頓時被我清晒；羊架又唔會騷，岩晒我最怕騷味既人。食咗咁耐生冷野，當然要叫番啲熱野暖胃。我就叫咗個蟹粥，蟹粥好有米香，啲粥有啲似潮州粥，一粒粒咁樣，非常暖入心。最後不得不提，就係一個怪味辣蜆。呢一個怪味蜆嘅汁非常之可口，我哋忍唔住叫10碗黎食，但係職員每次都淨係比一碗我哋，份量仲極之少！真係有啲失望