今次唔食任食，試下高質啲(睇落)既火鍋本色，上二樓既門口，幾唔錯既望落，舒服，有心機
一部分既廚房係開放式既
有卡位有枱位，星期六晚上黎講就唔算多人，周圍行下，其實舖內都有啲特色擺設，加分
準備叫野，湯底未寫已上醬料，要有既都有啦
平反一下先，之前好似見到好多話服務差態度差既食評，入門坐落到依一刻，服務態度相當唔錯，唔知係大幅改善左定俾人寫定我好彩，僅代表我單次經歷
叫野食
多選擇到一個點，湯底都勁多，由雞煲、海鮮鍋、到普通沙嗲麻辣連飲個啲螺頭白肺肉骨茶都有，最後揀左肉骨茶拼螺頭白肺，野食由刺身、海鮮都成版咁多，到牛、肉、丸、餃都有，而且特別既可以慢慢睇慢慢叫
最後，二人前我都揀左牛魔王(小)、香草帶子菜苗餃拼自家製韮菜墨魚餃(我肯肯定唔會再打咁長個名)、墨魚滑拼蝦滑、萵筍
跟住，湯底黎左，不得了
個樣都贏架喇，試下味，肉骨茶好正，真係飲緊肉骨茶咁，足料，唔係一個湯包或者淨係擺得靚hea你，好味
試埋個白肺湯，哇，一樣足料好味，直情好似老火湯咁(好似)，味道相當okay跟住落黎突然變左飲湯時間，飲到人地幫我地加湯咁濟
好，陶醉完就開始淥野，梗係要試試牛魔王先啦，牛魔王包括牛頸脊、牛柳粒、金錢展、手切肥牛（啲長名唔該睇返餐牌），牛頸脊，真心睇唔透全肥個兩舊係咩，牛頸脊同手切牛正既，算唔上係我食過既好好味，但比起平時食既牛就正好多、濃味好多啦
牛柳粒睇唔透，細粒而且唔太有味，金錢展就好個人，我自己唔太好但都好味既，成個牛魔王幾okay但就份量少啲，一樣加一至兩片就會好好多，下次食會直接食一碟手切牛好啲
墨魚滑拼蝦滑，墨魚滑係出眾既，連我咁鍾意食蝦都覺得墨魚滑正啲，兩個滑都刻意留返啲蝦同墨魚既肉（即係唔係全打膠），令口感好左
墨魚滑要試
萵筍，係呀萵筍都要講下，佢係厚身啲個隻，唔刻意淋可以早啲落，吸味吸得好啲
順帶一講，白肺湯淥野好味啲，肉骨茶好濃，飲就正
最後就係韮菜墨魚餃拼帶子菜苗餃，帶子菜苗一食有芝士，即刻搵個餐牌睇下以為自己叫錯左，但睇下又真係有香草有帶子有菜苗（因為另一個有寫芝士個個係南瓜），普普通通，有特色既，都值得一試既
但成碟份量真係少，得6隻但成百蚊
韮菜墨魚餃，OMG，你唔食韮菜就無得講啦，如果食既，依個餃實在太正，將韮菜豬肉餃未至完美既缺憾一次過補返，要食過先知我講咩
值得一提既係佢有Asahi同1664既draft，令你既晚餐質素升左一級
(當然埋單都升左一級)
總括而言係一餐幾唔錯既晚餐，首推必食自家製韮菜墨魚餃，手切牛、墨魚滑okay，海鮮下次再試
直至依一刻，服務態度相當不錯，殷勤之餘，煲蓋一滾就幫我開、我一次叫加湯都未試過全自動、有禮貌，我見附近啲枱都係咁，唯有話可能只係今晚啲客有既待遇，單次性經驗，但就相當不錯囉
#韮菜墨魚餃真係要試
#有啲貴
#其實佢有任食
#連啤酒都有唔使飲百五蚊
