極尚大瀛喜日本料理 (已結業)

今日最開心嘅事，約朋友食放題☺️☺️諗住12點先開，唔急啦，點知去到已經排緊隊入去，大家咁準時嘅🤣排到我哋入去嗰陣其實都未到12點，點知已經好多人食緊出面啲前菜同小食啦🤣其實lunch有三個鐘時間食，可以慢慢食。第一輪一定係食刺身先啦，我哋每樣都叫咗少少試吓先，唯獨係蝦，叫嘅份量比較多，結果發現蝦多啲擺盤會靚啲㗎，好開心🥳赤蝦大大隻，而且比甜蝦更甜，推介一定要食呀。油甘魚加埋塊紫蘇葉，勁香口。帶子夠鮮甜，希靈魚都好甜，都有encore 。另外花海蜇有驚喜，好彈牙。刺身質素都比想像中高，甚至比某些壽司店更好，可能消耗得快，反而更新鮮。之後第二輪嘅刺身質素都冇下降，可以放心食🤣之後叫咗啲熱食，發現大部分都幾好味，可以媲美出面啲單點嘅餐廳，例如鰻魚、吉列蠔、清酒煮蜆、扇貝。。。全部都幾好味，當然仲有大家都會點嘅大大塊花膠，不過食完會飽飽地🤣因為唔想食飯，所以冇點到壽司，不過我見人哋點咗好多，望落去都幾唔錯。以$218咁嘅價錢，可以食3個鐘，仲有咁嘅質素，真係抵到爛，唔怪之得長期都咁旺啦，係我食過嘅放題餐廳入面算數一數二，下次一定會再去。