影片
更多
2015-11-02
517 瀏覽
小妹雖則未至於上山下海，但都叫做食過唔少嘢。而今次呢間嘢，真係要容許小編唔客氣地直接講呢間嘢係「中伏之最」！喺度真係要好好同大家分享下個日嘅經歷。小妹連同四位朋友食飯。到鋪頭門口，見到間鋪門面係有花過吓心思去整，窄身嘅門口再加三塊長身玻璃做窗口可以睇到入面啲人食嘢，真係有幾分歐陸嘅style。香港地呢啲嘢好吃香，唔怪得之可以大排長龍。入到去，頭頂有吊燈，牆身掛咗兩三幅畫，裝修同餐枱亦似模似樣，除咗話間鋪細咗啲難啲出入外，基本上都環境係真係冇嘢挑剔嘅。跟住望個menu，幾詳細，菜式有齊中英文名，去到呢個位，眾人仍然都係感覺良好嘅。好啦，戲肉嚟啦。大家期待已久嘅嘢食終於登場。先講個香脆雞翼泰式冬蔭功金邊粉，我哋係叫咗兩碗嘅，而竟然兩碗嘢個湯底係完全唔同味：一碗係又苦又酸，湯底杰得嚟但味道偏淡，而另一碗就唔知點解勁多辣椒油，搞到成碗嘢感覺油淋淋。而無論係邊碗都好，都冇冬蔭功應有嘅辣味，金邊粉亦浸到淋哂，一啲都冇咬口。仲有隻炸雞翼先係敗筆重點，炸雞翼上菜個陣竟然浸喺碗湯入面，食落口完全係皮肉分離，叫人點食落口？而隻雞翼叫俾吓面咬一啖，老實講唔知點勁醃先醃到咁鹹，鹹到條脷痺一痺，甘拜下風。跟住到
小妹連同四位朋友食飯。到鋪頭門口，見到間鋪門面係有花過吓心思去整，窄身嘅門口再加三塊長身玻璃做窗口可以睇到入面啲人食嘢，真係有幾分歐陸嘅style。香港地呢啲嘢好吃香，唔怪得之可以大排長龍。
入到去，頭頂有吊燈，牆身掛咗兩三幅畫，裝修同餐枱亦似模似樣，除咗話間鋪細咗啲難啲出入外，基本上都環境係真係冇嘢挑剔嘅。跟住望個menu，幾詳細，菜式有齊中英文名，去到呢個位，眾人仍然都係感覺良好嘅。好啦，戲肉嚟啦。大家期待已久嘅嘢食終於登場。
先講個香脆雞翼泰式冬蔭功金邊粉，我哋係叫咗兩碗嘅，而竟然兩碗嘢個湯底係完全唔同味：一碗係又苦又酸，湯底杰得嚟但味道偏淡，而另一碗就唔知點解勁多辣椒油，搞到成碗嘢感覺油淋淋。而無論係邊碗都好，都冇冬蔭功應有嘅辣味，金邊粉亦浸到淋哂，一啲都冇咬口。
仲有隻炸雞翼先係敗筆重點，炸雞翼上菜個陣竟然浸喺碗湯入面，食落口完全係皮肉分離，叫人點食落口？而隻雞翼叫俾吓面咬一啖，老實講唔知點勁醃先醃到咁鹹，鹹到條脷痺一痺，甘拜下風。
跟住到泰式海南雞飯，而朋友未食之前，有另外一枱客叫咗兩碟，第一碟睇落個款okay，第二碟就出哂事，得兩三嚿肉好似施捨咁，隔離果台都忍唔住投訴.所以我朋友都好驚到佢個碟個陣會中伏。之後嚟到，好財個樣都正常，起碼冇好似隔離果台咁俾人批左個頂/.\點知食落口就出事：油飯食到勁油，但冇香味，而且飯身散修修，敗北。雞就有挑到骨出嚟，但完全冇雞味，難聽啲講真係唔知自己食緊乜肉落肚，大佬食雪藏雞都有丁點雞味啦掛，呢碟嘢我朋友話係佢食過一世人裡面最差嘅海南雞飯。
第三道菜係芝士焗波羅鮮茄豬扒飯，呢兜飯大家睇圖片就已經足夠，茄汁明顯唔夠，連少少嘅配菜都冇，大家樂都有兩嚿西蘭化啦吓話，賣相十足樓下茶樓賣比中學生個啲十零廿蚊嘅頹飯。點解唔講味道？因為我朋友一見到咁嘅款，直頭罷食，自己直接出咗去另外搵嘢食，到最後兜飯係冇人理過。。
講得興起之際，差啲唔記得mention個南瓜湯、羅宋湯同荔枝烏龍茶，南瓜湯好鹹好杰身，質地十足係BB仔食個啲糊仔，而且又係唔知點解完全冇南瓜味。至於羅宋湯，好淡，略酸，都算，但最神奇嘅係，飲落唔知點解會有藥材味。荔枝烏龍茶，淡味到近乎無味，飲落勁似零卡路里健康水。其實仲有一個紐西蘭西冷牛扒薯菜，但呢道菜唔會有圖，更加唔會有食評，因為當全世界都食完嘅時候，碟菜係仲未到，大家都已經食到一肚火，唔通仲同佢乾等？最後嗌cut單大家埋單走人。到走人之時，朋友見到隔離枱嚟咗個道菜，睇個款就係漏咗單個碟，係除左薯菜改咗做意粉，但個意粉竟然直接蓋喺塊扒上面，成個look禾稈冚珍珠咁，我朋友即時感到心存僥倖。。咁樣出貨比人都得？
食後總結：食過難食嘅野，先會識得惜食。明將如此，呢度亦係如此。如果個老板睇到我呢篇食評,麻煩真係俾多小小心機落野食身上...
張貼
