翔壽司 (已結業)

一段時間無出街食飯，好掛住日本菜！所以呢日喺尖沙咀工作完，就去咗厚福街嘅翔壽司食lunch！據知翔壽司由前米芝蓮推薦餐廳嘅壽司師傅班底開設，店主理念反而係從中高檔改走平價路線，見午市定食定價合理，就一於試下！估唔到2pm多都仍然有唔少客人呢！北海丼($208)北海丼有7款魚生，包括：中吞拿魚腩、油甘魚、三文魚、赤貝、牡丹蝦、海膽、三文魚子。每款刺身都有約兩片，每片都好厚切，口感十足。吞拿魚腩油脂分佈平均，魚脂甘香。赤貝新鮮度足，入口仍然爽口彈牙。三文魚子落得慷慨，充滿鹹香。海膽完整乾身，雖然鮮甜度一般，但無任何腥味，尚算新鮮。牡丹蝦甜美細滑，啖啖肉好滿足！午市定食仲包埋沙律及麵豉湯！店員服務都幾殷勤，不時留意客人需要及主動斟茶！