泰邊爐 (已結業)

平時喺旺角掃街掃得多，今日去瓊華搵食，見到一間新開嘅泰國菜，泰邊爐。喺門口睇入去好有氣氛，就同朋友一齊入去試吓。坐低之後，員工會好主動向你推介店裏唔同嘅食物，當湯底到咗之後，又會建議我哋試吓頭啖湯。冬陰公湯底夠開胃，如果酸少少味道會更好。椰子雞，真係好足料，有好多椰子同埋真係有好多雞件係入邊，味道清甜。店內除咗有不同嘅邊爐料之外，仲有唔同嘅小食，比客人可以自助去領取。菠蘿抄飯米香又有咬口。泰式雞翼，雞翼炸得脆香，醬汁開胃。叫咗份手切牛肩肉，用隻牛嘅擺設放住，感覺好得意，啲肉質好嫩滑。肥牛瘦肉偏多，嗰邊有少少油脂，啱晒我呢啲鍾意食比較瘦嘅人。而且望落都好新鮮，完全冇雪藏感。蔬菜拼盤，啲菜全部都好新鮮，而且洗得好乾淨，食落都好鮮甜。你都梗係要試吓啲特色嘅泰國嘢飲，我叫左一杯Final fantasy。好足料，入邊有好多野莓，望落都好靚。飲落酸酸甜甜，感覺幾清新。最後梗係要試吓啲甜品啦，熱嘅芋頭西米露，芋頭好軟，入口即溶，甜度啱啱好。啲椰汁糕賣相整得好靚，都好好味，但係有啲放得比較耐，有少少硬。總括今次試新餐廳，感覺都唔錯，下次可以再嚟試吓。