Little Mario's Pizzeria (Life@KCC ) (裝修中)

今日去葵興站附近睇新Office，放工已到晚飯時間，就試吓約好久不見，又喺附近返工嘅朋友食晚飯聚吓舊，又比我成功邀請到喎，佢仲作為東道主介紹我嚟呢間餐廳。呢度除咗主打食Pizza之外，仲有其他意粉沙律同小食。食西餐習慣要食個沙律菜，所以就叫咗個Caesar Salad，我呢個朋友慣咗食清淡嘅菜式，所以就揀咗配蛋同煙肉碎，醬汁係自家製，味道清新。Caprese Pizza係一個素食嘅薄餅，材料包括新鮮蕃茄、黑橄欖、Mozzarella芝士同埋羅勒，其實Pizza用最簡單嘅材料就已經好好味。朋友仲推介呢個叫做Jalapeño嘅墨西哥小食，佢係用芝士包住墨西哥辣椒製成，帶小小辣，味道獨特。叫咗一杯熱朱古力，個花拉得好靚，朱古力味香濃而不太甜。另外我叫咗一杯西柚凍茶，夠晒冰凍，因為有薄荷葉嘅關係，所以味道特別清新。啱啱嘢食到齊晒，嚟個大合照就可以開餐啦！