心裡有素 (已結業)

今日媽咪話想食清淡少少，於是提出食素食，見到廣華街附近呢間素食自助餐好似幾抵食，所以一試。風格比較平民，同埋真係自助式，自助區嘅範圍唔算大，不過對於我哋來講嘢食都足夠，選擇幾多，有蔬菜類、湯、沙律、炸物、炒粉炒麵、同埋幾款蛋。冷盤方面有蒟蒻麵、涼拌粉皮，口感都好好，食完會想再食。基本上大部份嘅食物自己都有試，全部嘅味道都好好，蔬菜類，例如西蘭花椰菜花，萵筍都係好爽脆，唔會煮到林晒，同埋每一款嘅味道都唔同，調味料唔會一式一樣。另外佢嘅炒飯同埋炒麵都好好味，仲有一款係乾炒伊麵，好入味，而且會煮到好濕，炒飯亦都係，好足料。值得一讚係佢嘅茶葉蛋真係做得非常出色，比坊間食開好多都更加入味！另外佢仲有一款蒸蛋，口感好滑，好有蛋香！ 佢哋refill嘅速度都好快，另外唔會重複出同一堆嘅食物，有時都會有新嘅食物放出黎，整體都抵食！