板神鉄板燒日本料理 (The Hennessy) (已結業)

今日嚟到灣仔，同個好耐冇見嘅朋友，想坐得舒服啲，又想食日本野，就揀左板神食鐵板燒！無論服務同食物質素都係5星級！每人一個一人前，全個餐連甜品一共八款食物。前菜 - 沙律豆腐魚子，蒜頭，配搭新鮮，味道出奇地好，而且非常開胃之後有三款刺身，包括吞拿魚赤身，味道鮮甜，完全唔洗點任何醬汁都好好食。而且師傅喺我哋面前砌出刺身，仲可以欣賞刀打！再嚟就係南非鮑魚，配上秘製醬汁，味道超正，而且好有咬口，一試難忘。第四道菜係白甘鯛，係我全晚最鐘意嘅菜式。師傅將魚鱗爆一爆，再將魚塊煎香。最好食嘅地方係 魚肉依然非常嫩滑 鮮甜，再加上煎香左嘅魚皮，真正做到外脆內滑！之後仲有日本大蝦，師傅拆肉，然後將蝦膏同肉一齊煎香。蝦嘅香味同味道都非常濃郁。食鐵板燒當然唔少得牛！今餐個menu有日本A5和牛薄燒。和牛有牛味，雖然未到入口即溶，但都算中上水平。再配合爆香左嘅蒜片同葱，令食物味道提升，更有層次！最後仲有個炒飯。鐵板夠熱，炒得勁香口，好好食！ 仲可以添食添！最後就係味憎湯同甜品！味噌湯味道濃郁，飲得出唔係出面啲罐頭湯。甜品係自家梨蛋糕，味道出奇地好，唔太甜，好食！除左食物外，環境同服務都係用餐體驗非常重要嘅一環！