上海弄堂菜肉餛飩 (已結業)

平時食得多西餐，放題，今日就同朋友搵咗間上海菜食下。餐廳位於灣仔同銅鑼灣地鐵站之間的天樂里，兩個地鐵站行過黎都有少少路程，要行十分鐘左右。對住電車路出面，都幾易搵。中午黎到已經唔算好多人，環境舒適清靜。裝修都很有古式風味，牆上有啲很舊式的相片，中間天花頂的一盞特式大吊燈，滲透著濃濃的复古味。全日供應的1人套餐，$86/$98已包小食，主菜同飲品。前菜之一，酸辣湯，材料豐富，有木耳，粉絲，豬肉絲等，湯比較稠身質地，飲落唔會好辣，酸辣味好夾。另一個前菜，菜肉餛飩，4隻，湯底是䜴油湯底，清甜可口，餛飩皮十分滑溜，誠意之作，韭菜同豬肉餡的比例都剛剛好，咬落爽口清甜。無錫排⻣，跟菜飯，飯粒結實大粒，菜粒鮮甜，混入飯中感覺清新，排⻣煮得十分淋身入味，肉質厚，醬汁好惹味，送飯一流。上海炒粗麵，麵條彈牙，粗度適中，有很香的醬汁味道，色澤光鮮，加上有清脆的小棠菜同薄豬肉片一齊炒，更加美味。桂花酒釀丸子，少少酒香味，有好多桂花粒同米，食落層次豐富，丸子都好彈牙，糖水清甜。仲叫咗兩杯凍豆漿，香滑清甜，食上海菜的絕佳配搭。