L'AMOUR

營業中

休息中

今日朋友生日,特登入大埔同佢食餐飯慶祝一下,問咗幾個住大埔嘅朋友都推介我去呢間餐廳酒吧食飯,佢哋話食物質素都幾好,氣氛又唔錯,所以我地去試下。L,'AMOUR ,餐廳環境好有格調,氣氛令到我有好放鬆嘅感覺。最適合同朋友喺度傾下計,食啲嘢。首先點咗兩杯酒,Rose ,cocktail望落去都好特別,上枱時有個氣泡最適合打卡,睇住個氣泡爆破慢慢滲出一陣輕煙 ,入口味道都唔錯,唔覺有酒精,加上有荔枝味甜甜地,真係好好飲。龍蝦沙律,材料非常豐富,而且顏色亦都相當吸引,望落去就好是一件藝術品。龍蝦肉爽口彈牙味道鮮甜,配埋各種新鮮嘅蔬果令到鮮味更加突出,食完個沙律真係好開胃。烤焗紐西蘭羊架,羊架size都好大件, 入口羊肉味香濃,肉質仲係好鮮嫩嫩滑,有少少脂肪,最先食到淡淡的羊肉香味再嚟就係油脂嘅香味。忌廉加拿大海膽扁意粉,賣相相當吸引,一大片新鮮嘅海膽放喺意粉上面,見到已經流口水,海膽嘅味道好鮮甜,而且鮮味已經融入咗意粉入面,每一啖意粉都食到海膽嘅鮮味,加上忌廉香味,意粉味道好有層次,值得一讚就係意粉軟硬度適中,唔會太過淋,好有口感。