風味館海鮮私房菜 (已結業)

中意試新野既我今日同男朋友去左九龍城搵好嘢食，九龍城對於我來講係一個美食天堂，周圍都有好多唔同菜系嘅餐廳，簡直琳琅滿目。見到呢間啱啱新開張，凍凍地嘅天氣羊腩煲實在太吸引！即刻就拉咗男朋友入去！呢間餐廳有好多特色嘅菜式，可惜今日得兩個人試唔到太多。環境好乾淨寬敞，以綠白色為主，簡潔舒適，食野都舒服d~呢個係古法炆羊腩煲，羊腩煲上菜嘅時候已經聞到震震香味，羊腩煲裏面有好多唔同嘅配料，包括炸腐竹、馬蹄、竹筍等等，全部都索晒汁嘅味道，好正！至於羊腩一啲都唔"un"，點埋腐乳一齊食簡直就係人間美食呀！原來另外仲會送一籃生菜打邊爐！新鮮既生菜索晒羊腩煲既汁，甜得黎又爽脆，實在太好味啦！去到邊都唔少得既魚香茄子煲，好香咸香味，最重要既係茄子煮得夠淋，索晒味，非常惹味，配白飯一流！呢個係古早醬油黑叉燒，絕對係男士們既最愛！叉燒偏肥，但食落去一d都唔會覺得肥膩，反而好有質感同埋味道非常濃郁，從未食過呢道菜，食過番尋味，下次會再叫！最後叫左個清淡少少既鮑片白菜仔，鮑片好大塊，有咬口得黎又好夠味，白菜仔好清甜爽脆！一樣咁簡單既菜式都煮得咁出色！完全無後悔過試左呢間新餐廳，下次要帶埋屋企人一齊去！