廉記冰室 (春園街) (已結業)

收工收得早，見到春園街開左間懷舊茶記，裝修又幾高檔，而且乾淨，決定試下。由於接近六點，未有晚餐，於是叫左豉油雞脾同薯條打發下時間，志在吹水。由於旺區關係，人客都好多，見好多人叫麵包加餐飲，估計麵包係主打。話口未完，香噴噴既滷水雞脾已上台。雞脾好大隻，成個碟甘大，而且幾入味，雞肉都唔鞋口，點上少少甜香既滷水汁，唔錯。薯條係粗身，加上少許椒鹽，好香口。食食下都已經晚餐時間，順便係度食埋。煎左口魚豉油汁，條魚大到覆蓋成碟飯甘滯，魚肉嫩滑又冇骨，少少豉油吊味都夠鮮甜，仲有例湯送，係南瓜濃湯，我反而覺得稀返上少會比較好味。另外叫左招牌香脆燒豬肘加酸菜薯仔，等左大半個鐘左右，因為即叫即燒緣故。豬皮燒到卜卜脆，冇得頂，熱辣辣好香口，豬肘肉完全冇肥膩感，而且好嫩，啖啖肉加上酸菜，味道合拍。值得一提係餐廳咸檸七，個咸檸檬好大個，相比其他餐廳得一小塊好好多。