瓏門冰室 (已結業)

就幾個朋友既翻工地方，所以就約咗係食野好貴既尖咀，咁我梗係要揀翻啲平價啲既餐廳啦。一開始以為冰室得三文治、公仔麵、碟頭小飯，無諗過都有啲高質野食。我叫咗個鐵板餐，係至尊海鮮配黑椒汁，個餐包咗餐湯同餐飲。其他人朋友都主要係叫咗鐵板餐，我地都夾咗2個小食。餐湯係忌廉薯仔湯，口感都好特別因爲有薯仔蓉。個鐵板真係好足料，一嚟到真係嚇親呀。有一塊煎咗既龍利柳，3隻青口，三隻蝦頭，3粒帶子同埋幾舊魷魚圈。個帶子真係好滑，青口就好大隻，都幾肥美。比咗一隻蝦朋友食，佢都話好彈牙。黑椒汁真係好濃，陪落啲海鮮同薯條都幾夾。黑椒香蒜牛扒配炸蝦，個炸蝦幾脆，見到仲有四五隻，好足料。紐西蘭羊架配香草腸忌廉汁帶了意大利飯蜜糖雞翼，好重蜜糖味，真係見到啲蜜糖搽咗係雞翼既表面架，入面仲好入味添。咸牛肉芝士玉子燒，岩晒鐘意玉子燒既我，有啲咸牛肉係入面夾住，真係好夾。