十二味麻辣小當家 (已結業)

呢排真係超熱，攪到我無哂胃囗！老公帶左我去食我至愛嘅辣野！之前已經食過銅鑼灣分店，覺得好惹味好開胃！今次去到奧海城分店，裝潢一樣都係走「中國風」！呢間分店有室外同室內嘅座位，不過天氣咁熱，我地當然諗都唔諗揀坐室內！我地點左至愛嘅「麻辣香鍋」，餸方面今次點左嫩牛肉、午餐肉、金菇、寬粉同豆皮！另外仲加點左一個酸辣土豆絲！「香鍋」一如銅鑼灣分店一樣香噴噴，麻辣味十足！最重要係香辣得黎一啲都唔油膩，唔會話食到成口都係油！呢樣超正！之前喺銅鑼灣次次都係order肥牛，今次就選擇左嫩牛肉，個人覺得比肥牛更好食，牛味更濃郁之餘口感亦更嫩滑，而且份量亦多！午餐肉係預先煎過，出左啲油反而冇咁油，同埋更惹味呢！金菇係每次必點，索哂啲麻辣汁好好食！如果唔係怕食唔哂，真係要叫返碗白飯黎食先夠perfect呢！寬粉同豆皮份量超多，好味之餘又飽肚！酸辣土豆絲我地叫左唔辣，怕老公頂唔順咁多麻辣野！哈哈！土豆絲非常爽脆，蒜味亦十足，雖然唔辣但係亦非常開胃!最後叫左個擂沙湯圓，湯圓係芝蔴餡，煙煙韌韌咁，唔會太甜，可以中和一下成口麻辣味，得三粒真係唔係幾夠喉呢！奧海城分店整體質素同銅鑼灣店差不多，價錢差不多，地點亦方便，