今次餐廳多咗啲貓貓掛牆畫，雖然冇以前咁淡雅，但令環境變得活潑。加上同Chef Sandy閒談一陣，知佢鍾意貓貓，如果環境令佢開心，可更用心為客人烹調美食，我係絕對支持嘅🙋🏻♂️
Service team方面，我記得之前係有位年紀大啲嘅侍應，佢serve客時好淡定好優雅，我好欣賞；而家呢一team就後生啲，優雅感都爭啲啲，不過介紹菜式時都好用心，尤其係4眼女同事，我都欣賞佢對客人嘅貼心👍🏻
2
呢個南瓜湯夠杰夠濃味，加咗啲咖啡粉同米通令湯嘅味道更有層次更特別
呢隻蟶子真係不得了！煮熟程度真係啱啱好，咬一口你就會感覺到聖子外層有彈性而入面係細嫩，加上麵包糠碎又令佢口感更佳，加分
2
龍蝦湯我比較鍾意杰身嘅口感，不過既然叫做macchiato，稀身嘅texture都預咗。但估唔到佢真係用coffee mug上菜😂味道絕對無愧對macchiato呢個名，濃濃嘅龍蝦味，齒頰留香，飲完會有種龍蝦湯嘅味道環繞口腔。龍蝦肉嫩口清甜，但點落呢杯macchiato就爭少少，因為啲湯唔夠杰，所以痴唔到上龍蝦肉度。
1
無晒Gillardeau，今次就初嚐Ancelin，都唔錯。肉身同Gillardeau比冇咁creamy，帶子位都甜，裙邊冇乜特別，有海水味但唔會太鹹，味道唔複雜，開始接觸法國蠔都可由呢款蠔食起。
1
海膽係呢道菜只係點綴，隻63°C蛋同lobster foam先係主角！因龍蝦泡沫味道已好濃郁，篤爆蛋黃後令口感更細膩滑溜，完全比lobster macchiato更出色，所以海膽只係令佢多一層口感，算係錦上添花(其實我覺得唔係用海膽加其他都得，如soldier或啱啱提及嘅龍蝦肉點上lobster foam應該唔錯)。
1
你睇啲肉嘅顏色真係靚到呢～簡直係medium rare嘅極致！US prime有靚嘅脂肪分佈，牛味香濃，配上少許鹽同黑胡椒已經好好味，絕對比得上好多出名嘅扒房
另外提一提個side叫夜香花，即係茉莉花，所以食落真係有茉莉花香，初次食幾特別不過未去到話好好味。
最後甜品叫咗呢個迷你小泡芙塔，外層salted caramel加上入面凍嘅cream好好味，但甜而不膩，令我瘋狂食咗好多粒☺️
小總結：今次同Chef Sandy有機會傾下偈，發現佢都幾有童心，會不斷發掘新嘢，勇於作出嘗試同改變。可能因為咁，佢有多菜式都會嘗試加多少少嘢，就係啲少少嘢，會令口感同味道加分。我會期待下次光臨嘗試蟹膏飯🤤
