點一龍 (海港城) (已結業)

噚日試過點一龍，老婆又想試吓，所以今日專程買咗兩款雪影飽同木瓜杏汁糕返屋企，雪影飽買六個送兩個，$56，木瓜杏汁糕$25一份，叫咗兩份，合共$106。約六點左右到尖沙咀，服務員話要等十至二十分鐘，既然一場來到，當然照等；豈料， 一等就等咗半個鐘；幸好當服務員揣出來時，的確係熱騰騰，剛剛焗出爐。返到屋企，第一時間俾老婆試食，自己當然都食番個，仍然熱烘烘。雪影义燒飽，可能因為夠熱的關係，飽皮比噚日更鬆軟，更香；义燒餡料亦似乎比噚日多一點點，夠香，夠味，值得加分。另一款，雪影朱古力飽，飽皮一樣鬆軟，一樣夠香，咬開，內裡嘅朱古力漿呈流心狀，十足”心太軟”嘅效果，據報章嘅報導，點一龍係用58%嘅Valrhona朱古力做，確實朱古力香味十足，絕對冇苦味，亦冇奶味，的確好滑。至於木瓜杏汁糕，賣相一流，紅中有白，討人歡心，木瓜夠腍，唔實，與杏汁糕嘅質地相襯，可惜杏汁糕味淡，唔夠杏仁味，若對杏仁味有好感的話，相信會比較失望。