麻酸樂米線專門店 (已結業)

呢日放左學，行過如心廣場。咁想食碗粉麵，睇黎呢度都算係唯一既選擇。唔知係唔係無乜人流既關係，呢間舖真係無乜客咁滯。都好既，可以食得舒服既。大辣腩肉米線個湯底有小小俾我係用水溝既感覺，只係用清湯再加辣椒粉整出黎既湯底。我覺得呢個湯同麻辣談不上一點關係，其實真係麻麻地。另外，個腩肉反而比我預期既好。肥瘦適中，而且唔算太韌既。個米線就ok啦，都算幾淋既，又唔會太韌。蒙古大汗雞翼呢個係炸雞翼再加上七味粉上既小食，其實都ok既。因為呢個係個餐送既，真係無乜要求可言。呢個雞翼都算幾好食既，肉質尚算鮮嫩。只係覺得兩隻有唔夠喉，都ok啦。凍奶茶呢個就無乜特別，有奶同有茶就叫凍奶茶。不過，呢杯凍奶茶同茶餐廳既質素真係有距離架。呢餐都差唔多三十蚊，其實貴唔貴就見仁見智啦。不過對我黎講就真係幾貴，出番去第二米線舖可以用咁既價錢食到更多既食物。