盈翠軒 (裝修中)

我宜家先知原來放題係有限食數量，每人只得六隻大閘蟹，仲要鬼鬼鼠鼠咁，細細隻寫喺傳單最底，D蟹又唔熱，微温，膏唔油唔香，垃圾，最最最諷刺係未食野就已經埋單，又話$328，吊起佢老媽子，要原價加一，原價$520，即係加一$52，仲要茶位$18，即係埋單$398，個原價你話幾多都得啦，咁不如話免費任食，只收加一服務費，原價$3980，加一就係$398。嗰碟什麼大廚炒飯，仲衰過大X樂嗰D$35福建炒飯，叫個廚師去學多十年八年廚先出嚟撈啦，影衰晒大廚兩個字。頂級鮮蟹肉燕窩羹，如果你喺隻碗度畫隻燕子吐口水，我都當你有燕窩吖，我舐埋個碗底都唔見有燕窩，我D口水應該多過你D燕窩，改做 雪藏碎蟹肉生粉羹可能好D。