捌壹公館 (已結業)

作為抹茶愛好者梗係要叫返杯鮮奶抹茶一黎到忍唔住飲啖先！ 好濃既抹茶味 Like！（孜然原味原隻單骨雞翼）聞落同食落都有淡淡既孜然味，調味調得恰道好處，唔會太咸。（慢煮牛肋條配香煎上海年糕）大力推介！牛肋條炆得啱啱好，唔會淋到夾都夾唔起，食落口仲有少少咬好。第一啖食落口覺得黑椒味太濃，但之後連埋年糕一齊食又唔會覺得太濃味。年糕煎咗少少，脆脆地再點埋個汁食，好夾！老闆話年糕無再額外調味，費事成道菜式過於濃味，依家咁就剛剛好，食到各種食材既味道。（煲仔番紅花海鮮虎蝦意大利飯）另一推介！落單時老闆問想食淋D定有咬口D，我地話有咬口D。果然無令人失望！意大飯仲帶有少少咬口，米粒唔會煮得太耐淋哂，同時啖啖入口都有海鮮湯既味道。隻虎蝦更加無令人失望，仲係彈牙架，可見用料新鮮，用心製作。（話梅菠蘿醬配窩夫及雪糕）Topping既菠蘿醬唔係用Syrup溝出黎，係用新鮮菠蘿整，清新 Fresh，唔會係死甜既味道。總結，用料新鮮，menu設計都用心，老闆員工服務態度都十分好。整個用餐體驗都十分好。下次會再黎試佢既其他菜式。