見到張poster，覺得o個個八爪魚造型麵包同埋佢話似磨菇，我又覺得似象拔蚌o既麻糬包好吸引，一於試晒佢地！最後隻香菇麻糬包呢個moment 無貨，但都試到八爪魚包，同埋揀o左好幾個其他麵包。
重點章魚大哥($28) 實物比圖會肥仔一d，同埋眼大大的，成隻傻傻o既樣子！對眼由白朱古力整成，甜度好高，麵包外層黐滿脆脆，裡面d 腸仔拮出o黎o既部份剪成八爪魚腳，係司華力腸o黎o架～同埋再嵌入o左d 肉鬆咁。
簡單講埋其他包先，芝士金磚($19) 帶住淡淡o既芝士味，外層甜甜的。蒜香煙肉軟包 ($28) 除o左搽上蒜香醬去烤焗仲瀋上芝士粉，聞落味道濃烈。酥烤羅宋($24) 係隻牛奶麵包，質感厚實兼飽肚。最後仲有頭先張poster 推介o既薯頭($24)，整到成舊連皮薯仔咁，裡面o既餡料同口感有d 似雞批，有火腿呀、粟米洋蔥等等。
因為呢間係sharetea 品牌旗下同集團o既麵包鋪，所以除o左賣麵包仲有個水bar 可以點台式飲料。我當然叫成日飲o既珍珠鮮奶茶($36) 啦，仲係有cream o既版本，非常邪惡！
朋友就揀o左杯奶蓋極濃日式抹茶($40)，佢早o係x 記推出o既時候就話想試，但網上評論好似就不太好……而家o岩晒啦，同埋呢間會有兩隻奶蓋選擇，可以配甜或者藍芝士(鹹)，佢嗌o左甜，覺得好正！
