TOOLSS (已結業)

早兩日突然想去野餐，結果星期六兒童節全年氣溫同紫外線最高嗰日，响冇搽防曬嘅情況下孭住背囊上山曬咗兩個幾鐘… 落咗山第一時間飲支裝肥可樂解渴，第二件事搵咖啡解睏。友人K鍾意隊啡，港鐵沿線咁搵，石硤尾得兩間啡店，另一間佢已試過。呢間店得12個位(原本6個，出飲品夾硬攝2個、街邊枱仔4個)。佢好想去，咁就排下隊啦。街邊有店方嘅木摺櫈，但店員哥仔話唔好坐街等會被投訴，結果齋企都係10分鐘內有枱，可接受。不過張枱黐住隔離舖頭啲地拖，麻麻地。我要咗regular sweet potato latte，因為條街冇乜呢款。其實冇啡底，但我問咗有奶泡，都可睇到功架。K要咗regular latte。個紫薯泡沫牛奶，淡紫色帶一抹奶花，隔離有朵太陽花嘅曲奇餅，襯住木匙羹、木樣托盤，幾有詩意。飲落明顯除咗紫薯甜啲奶都偏甜，奶泡散唔豐富綿密，粗唔夠滑。K嗰個佢話飲落同自己响屋企沖capsule一樣味道，啲奶又係偏甜。嚿餅唔鬆化冇牛油味，咬咗一啖放低。中途我哋換咗坐裡面，我面向街，比我見到頭先個哥仔開番啲櫈比另一啲人坐住等位即熟客先有位坐！？