牛摩 (已結業)

自從上星期實施咗控制四人以下同枱在外用膳之後，我發現唔係間間食肆都做得到，今晚去咗青衣城嘅牛摩，防疫措施做得足，入座前例牌度體溫＋用搓手液洗手，呢間舖寬闊，可以間枱座，足夠枱與枱之間有1.5米距離，坐得安心；去過牛摩都知係半自助餐形式，疫情後啲食物都加上獨立蓋保護，加上一人一爐，食得放心。美國極品牛小排＋海鮮放題，平日晚市90分鐘放題，$295成人。牛小排叫咗幾個round已回本，質素都唔錯，油脂分布平均，海洋就有海蝦及帆立貝，原本有埋墨魚仔，但侍應話無返工貨。一餐可有兩種食法，先用牛脂起鍋煎香肉類及海鮮，後可轉換湯底做火鍋，有九款免費湯底選擇，而佢哋嘅博多美人骨膠原啫喱雞白湯加10蚊，至於自助式，我推介草莓沙冰，鍾意草莓酸酸甜甜，有草莓香味，仲食到D草莓子；牛摩板燒、芝士豆腐、各種蔬菜都唔錯。