👅金牌滷水鵝
滷水鵝係最出名嘅潮州菜式，點都要試吓！喺呢度百幾蚊就食到一例滷水鵝啦！鵝肉得好入味又唔會過鹹，肉質結實唔乾柴，肥瘦適中！果然係金牌滷水鵝！下面仲有好多滷水豆腐墊底，啲豆腐朔晒啲滷水汁，真係好好食呀！覺得肥嘅可以點埋佢哋特製嘅醋，酸酸地好解膩。潮州辣椒醬都好出色，一定要試啊！
👅椒鹽腰果雞軟骨
呢味菜真係超級惹味，大人細佬都鍾意食，配啤酒簡直一流！腰果同雞軟骨炸到十分之香口，啱啱炸好熱辣辣，一啖一粒真係好過癮！
👅脆脆銀魚醬油炒飯
粒粒分明嘅醬油炒飯上面鋪滿咗香脆嘅銀魚仔同埋蔥粒，每一啖飯都充滿鑊氣味，口感豐富，魚同醬油嘅鹹鮮味真係好夾！食到乾乾淨淨一粒飯都無剩！😆
👅滷水雜錦拼盤
$8喺出邊連一串滷水串都買唔到，喺度竟然可以買到一碟滷水拼盤！仲要有鵝腸食添！除此之外，仲有大腸、墨魚片、紅腸、豬耳、豬腩肉！仲有豆芽墊底，超級抵食！味道都好正宗！
仲有好多好有特色嘅菜式都想試🤤下次帶埋屋企人黎試吓先！
1
