LAB10 (已結業)

平時同男朋友行朗豪坊都會由頂樓慢慢行到落1樓，今晚都唔例外，行到去10樓就俾呢間新開既餐廳吸引左入去，因為裝修好特別，白色為主既裝修似一間lab多過餐廳，見到有menu先知原來係食韓燒，食完果然有驚喜。首先一定要讚既係餐廳既抽風系統，因為食果時係完全無油煙味，可以舒舒服服咁食。食物方面，叫左精選和牛拼盤同鵝肝鐵鍋飯。拼盤份量適中，有厚切牛舌首爾牛肋條牛後腹肉同牛小排， 四款肉都非常juicy就算唔點醬都非常好味。可隨個人喜好點少少隨碟嘅香草同海鹽再燒都唔錯。牛舌爽口，厚而不韌。牛肋條份量較多，啖啖肉，建議可以燒耐少少口感更香口。 牛後腹肉同牛小排肥瘦均勻，食落好快溶化左喺口內，油脂唔算太多但勝在夠均勻。 如果驚d牛太肥的話可以加埋生菜一齊食都好好食。 至於鵝肝鐵鍋飯份量十足有四大片鵝肝, 鵝肝配埋炒飯粒粒香口得黎又唔膩， 食得好滋味。