餐廳備有兒童餐椅，訂檯時說明有小朋友，抵達時就已經安排好了。服務總體都算周到，反應快，加水勤，上菜速度都OK。
食物方面，小食沙律各式肉類，意粉焗飯薄餅，以及飲品甜品應有盡有。選擇都算豐富。
薯條炸得十分香脆，跟兩款醬，黑松露蛋黃醬同茄汁。我個人其實一向唔好點醬，覺得熱辣辣脆脆薯條灑上海鹽已經風味十足。而眼前呢兩款醬都係普普通通，黑松露醬汁隱約透出點酸味，唔係我杯茶。
蝦米雞蛋仔，外層香酥，蔥香突出，不過蝦米味唔係好覺。搭配肉鬆食更加香口惹味。小朋友至鍾意。
黑毛豬腩肉蝴蝶包，調味鹹中帶甜，頗為惹味，點上似甜麵醬的醬料再添風味。豬腩肉較瘦，老實講有少少硬，未能入口即化，不過未算乾。蝴蝶餅蒸得微暖鬆軟，帶有少少麵粉甜味，夾上肉咬一啖，都算唔錯。
炸三文魚飯團，小朋友主動點嘅，搭配了泰式沾醬。外層炸得非常香脆，內裏米飯保持了濕潤，都食到魚香，再點上pad thai醬，好夾！頗為加分。
酥炸24小時春雞，份量頗大，有整隻春雞，炸得熱辣辣香噴噴，賣相已十分吸引！掀開皮咬一啖，酥脆香口！再試雞肉，鮮嫩多汁！灑上少少檸檬汁，真是叫人食指大動，食完吮指！跟的少少椰菜沙律微酸清爽，很解膩，真是完美配搭。
又點了富貴鴨，擺一枱「雞同鴨講」😂
富貴鴨份量約1/4，有鴨脾一開二，正好滿足兩位小朋友，唔會厚此薄彼😌 鴨件炸過，表皮香口而脆，有醬香味。鴨肉都很軟，有少少鴨油，整體都很香口。跟一份黑松露炒飯，炒得乾身惹味，黑松露香與蛋香都頗為突出。
松露焗豬飯，依然是小朋友至愛，豬肉極多，勁芝士，非常香濃邪惡，我試左幾啖，確實非常惹味，雖然望落去份量唔大，但真係機飽肚又幾滿足。
菠蘿火腿豬肉腸香菜薄餅，呢款口味嘅薄餅老實講好難唔好食，總體確實幾好味，不過食唔到咩香菜味，菠蘿同豬肉腸嘅搭配酸甜香口，少少芝士，超薄餠身，一陣風咁食完，幾好。
黑松露意粉，煮得恰好，算是Al dente，鹹香松露醬亦算唔錯，不過不失。
價格適中，人均大約130。味道不錯，總體愉快，非常適合全家老少的合家歡之選。在太古城週末處處擁擠等位的情況下，依然容易有位。下次再來，會再試甜品。
