今晚我就帶友人W，去食我之前食過，覺得好食嘅灣仔Odelice。事隔數月，再次光顧，睇下食物水準係唔係真係Keep 到啦～
對上一次食係4月尾左右時間，今次黎佢地生意一樣咁好，一台接一台，成晚無停手。
至於個餐牌，有輕微變動，但signature 款式不變。
好喇～言歸正傳，講番食物先～第一道菜係生薑檸檬吞拿魚作前菜。吞拿魚經輕煎，令魚吃起來外帶微脆，內帶軟糯。面頭會有黑椒包住吞拿魚，食起黎會有一粒粒的有質感，味道有點點黑胡椒香，但不辣不嗆喉。加上檸檬的清新酸味，有既提鮮效果，令吞拿魚味道變得更加鮮甜和諧。
但老實說，生薑味就食唔出喇，我估計生薑係用黎辟腥，並非為主要調味料，所以至會唔係好食得出。Anyway，作為前菜，味道相當推薦！
如果有睇過我之前果篇食評，會見到我上一次狂食甜Crepe ，今次我就決定棄甜取咸，試下佢地既咸Crepe喇～ Crepe 同Galette 有啲唔同，Galette 用蕎麥麵粉+10%麥粉，再以雞蛋和水混合攪拌製作而成。相反，Crepe 係用牛奶去開麵漿架。
正常黎講，Galette 嘅配料越簡單越好，因為咁樣至可以食得出餅皮嘅麥香。今次點嘅係Parma Ham Galette，一眼就可以見到深褐色蕎麥餅皮上圍滿Parma Ham，更加上蔬菜、蕃茄、mozzarella 芝士及流心蛋做搭配，材料一眼睇曬，簡單唔複雜。
外邊酥脆，內裡煙韌嘅薄餅皮包著爽脆嘅蔬菜及清甜嘅蕃茄，中和咗咸香嘅Parma Ham及芝士。不過，正如我前言，食Galette係為左食佢嘅麥味，所以佢用既Parma Ham 無咁濃味架！亦因為咁，放到口裡满溢着蕎麥味道的薄脆與Parma Ham嘅少咸香一齊食會有一種妙不可言，再佐以流心蛋醬，味覺豐富而平衡。
不過，如果你問我，會推薦食咸定食甜，作為嗜甜者嘅我，我會覺得Crepe 味勝一疇。
這個黑毛豬肉係無敵好食！成餐飯最好食既正道菜！出面成日都會食到所謂既黑毛豬肉，但食落口就唔見有啲乜野大驚喜，會覺得同普通豬無分別！但呢一款黑毛豬堅係好有驚喜，食得出黑毛豬肉有一家嘅質素，呢塊豬肉外層係脆口既，入面亦超級Juicy，油脂分佈好平均，食落係堅彈牙，食落口一啲都無半點鞋口或韌或有根！口感絕對甘腴豐香，肉質細緻，爽而嫩滑，味道亦非常濃郁，真係真正的「豬有靚豬味」。以紅酒燒汁作底，有輕輕的葡萄香，能帶出鮮甜肉香，醬汁香濃，絕對一流！真的必必必食！
鵝肝就食得多喇～今次就試一下鴨肝啦～鴨肝口感上比鵝肝實啲啲，但口感同樣都係柔軟綿密，但會比味濃。
呢個菜既主角唔使講都知係鴨肝，入口滑順即溶，油脂極高，鴨肝嘅香味充斥住整個口腔，食得出鮮美無雜味。但由於鴨肝係油脂極重、意粉亦伴有油，以香港人口味黎講，單食呢道菜會有啲油，所以我極建議點杯紅酒作為搭配，以葡萄中和當中嘅油膩感。不然，會太飽滯，食唔落甜品喇！
1
好喇～ 黎到我每次食飯都最期待既環節，食～甜～品～Tiramisu，自家制Tiramisu，咖啡味香濃朴鼻，奶味則未算太濃，口感細滑綿密，入口即化且不油膩不死甜，全因咖啡味既中和，與餡料非常地對味，令人食落去每一啖都係幸福。
小Tips：話說我一坐低，我就同友人講，我好想食飄浮之島丫～點知～因為我前面食左太耐，食到人地差不多收工，當想點飄浮之島時，已經賣曬喇～所以如果你想食受歡迎甜品，記住落主菜時順便落埋甜品喇！
食後感：食咗兩次，基本上都食左佢地大約十樣既菜式。整體黎講，食物水準overall 都有7.5-8分，以signature 菜式較出色。
👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻
以下係我食左兩次之後，總結出黎既心水餐單（不分先後）：
雜錦塔丁拼盤，
虎蝦扁意粉（今次黎好似唔覺眼），
黑毛豬肉配紅酒燒汁，
生薑檸檬吞拿魚，
香蕉焦糖班戟（嗜甜者）
Tirimisu (不嗜甜者）。
