神戶屋日韓放題

營業中

休息中

今晚去左旺角兆萬搵食，望下水牌有咩食，見到8樓間神戶屋幾抵食。7-8:59pm $219起, 而9-9.25pm 就$189起，我地岩岩9點所以就食$189加一！放題既飲品任拎，之後梗係勁點刺身，一輪衝鋒叫左好多刺身，有三文魚、榮螺、蟹鉗、蝦、象拔蚌、玉子，仲可以每人叫一隻生蠔添。之後再叫d炸物，有芝士年糕、榴連年糕同椒鹽豆腐。呢間既芝士年糕唔錯，好煙韌，芝士多又香，唔會成舊粉。榴連年糕唔會好大陣味，一路食一路講食都唔怕臭親人。椒鹽豆腐又唔錯，炸皮薄豆腐餡滑。壽司叫左拖羅壽司、牛油果軟殻蟹同鰻魚手卷。鰻魚手卷包得好差，上到枱已經爆開左。壽司就中規中矩，味道較淡，醬汁不可缺少。之後點少得肥牛火鍋呢！湯底用清雞湯，配料都可以任叫，正！滾下蔬菜、丸、菇、粟米、魚文餃、肥牛等等，食刺身食到凍凍地打個邊爐都唔錯！最後每人有杯雪糕，食完火鍋再食返杯雪糕係正。