派龍殿 (已結業)

聽谷友講有新店開張，係食燒肉放題，價錢不貴便同家人黎試下。平日晚$238一位，食兩個半鐘，是晚唔滿客超時都無趕😎如果食早場或宵夜時段價錢就更平了。店內有熟食區，燒肉、刺身壽司、海鮮、沙律、甜品等，全部任食，refill得快唔使搶。先攞野食燒一燒，有牛、豬、雞、蔬菜等，肉類有原味或已調味選擇的。燒肉爐熱得快，無牛油紙或無掃油都唔黐底，抽風亦做得好唔大油煙，唯一就係燒多春魚會黐，有無高手教下路應該點燒好🤔燒肉食膩左又攞下熟食，張相可能睇唔出，其實係水煮牛肉同酸菜魚黎，辣辣地幾正。後面係刺身，仲有啲炸物，個老火湯正喎，螺頭雞湯🤤有專人幫手燒嘅生蠔，唔怕燒得耐擺住個爐啲位㗎。食飽就梗係食埋甜品先走啦，有各款杯仔蛋糕，雪糕雪條，仲有爆谷機同綿花糖機，個棉花糖機係造型棉花糖，有花花有心心等圖案揀㗎，打卡一流。飲品同樣多選擇，除左罐裝茶，仲有罐裝啤酒、汽水、果汁，另外有即磨咖啡機。哈哈，食到超晒時都無趕客，平日晚無乜人食宵夜呢。