維港灣餃子坊 (已結業)

見過好多人介紹呢間餃子店好食，今日黎試下，兩個人叫咗一個雙併湯餃：芫茜餃 + 鹹蛋黃芥菜餃、招牌四拼湯餃（芫茜、芹菜、大白菜、韮菜）、椒鹽豆腐同豆漿。每碗湯餃都有一個湯，碗湯好清甜，無味精。每粒餃子都脹卜卜，皮嘅厚薄適中，唔會太薄易穿而漏晒啲肉汁，又唔會太厚覺得無晒口感。芫茜餃配豬肉，味道好清新，食到材料每款材料都好新鮮；芹菜比芫茜更香口，菜同肉嘅比例剛好；最鍾意係鹹蛋芥菜餃，好獨特嘅配搭，每隻餃子都有大大舊鹹蛋，豬肉加上芥菜粒，好有咬口，好爽脆，又有鹹蛋香，但又唔會過份鹹，好有驚喜，超推介呢款餃子。每款餃子都有唔同特色，相對其他餃子鋪，維港灣嘅餃子係特別新鮮，會令人食完想再食。仲有辣菜甫任加，不過湯餃本身已經好好味，唔需要加其他配菜或者醬汁。椒鹽豆腐每粒都係細細粒，一口一粒，外皮好香脆，椒鹽味唔會好鹹，入面豆腐嫩滑，食到豆香味。鋪頭唔算好大，得幾張枱，佈置都好特別，有幾幅大畫。如果黎到元朗，想食餃子，一定要試呢間。