*
韓式泡菜炸雞刈包 $68
刈包鬆軟、微濕潤，好似一個好軟綿嘅饅頭，搽咗一層泡菜奶油芝士汁。炸雞外層炸到似鹽酥雞，肉質嫩、好juicy，撒啲辣粉，入面再包入泡菜梨片、京蔥、翠肉瓜絲。因為每一樣都好食，味道上又好夾，成個刈包都好好食！
*
套餐配炸番薯條及飲品 +$33
番薯條厚切，薄薄一層麵衣炸到脆卜卜、熱辣辣、唔油膩，番薯味又非常重，而且每一條都有梅粉，好正。
抹茶忌廉芝士壓餅 $45
餅皮係抹茶味，微微煙韌，餡多嘅關係所以存在感相對低。餡料係抹茶忌廉芝士，切開立即爆餡，抹茶味非常濃厚，忌廉芝士嘅酸味微乎其微，但又唔會太甜。個人覺得冇刈包咁驚艷。
