港口味冰室 (已結業)

好日都唔會黎長沙灣架，老公放工有啲野做要過黎，所以就喺呢度搵野食。好想食啲茶餐廳港式小菜，所以就試下呢間都幾多好評嘅港口味。我地叫咗個二人餐，有得揀魚或者海南雞，一個是日晚餐同一碟上湯浸時蔬。我地就叫咗海南雞。海南雞係起咗骨架，啲肉都算嫩滑，仲配以甜豉油！海南雞有好香油味，街坊質素黎講，佢係做得唔錯架。然後晚餐叫左個茄子牛仔骨，茄子好淋，味道剛好，但係牛仔骨就淋得滯，如過靭番少少平衡番就好。以一個晚餐份量，佢真係好夠多！仲有就係上湯浸時蔬。佢一上枱時，我地以為佢黎錯架！因為成碟好有誠意，以為係雜菜煲，仲有啲菇喺上面，份量又夠。係好驚喜。最後，老公仲咗杯凍朱古力，走薄荷。呢度幾好，仲以為佢會唔肯走薄荷。上面仲有一層忌廉，不過略嫌朱古力底唔夠濃。以街坊茶餐廳黎講，呢度真係唔錯。