牛角Buffet (雅蘭中心)

營業中

休息中

其實我冇喺香港食過牛角，之前食係喺日本食覺得超美味！而家冇得去日本，喺香港食下過下癮先。專登揀咗中午時間過嚟食，因為我貪平，見佢晚市好貴。中午有套餐，我揀咗最平嘅兩款肉$118/100分鐘，初頭我以為100分鐘係嗰兩款肉類任食，原來唔係，係只係有1.5 倍份量嘅肉，同埋自助小食甜品飲品區。肉類份量來講呢，1.5倍咗其實都係得幾片好少，一啲都唔過癮⋯⋯唯有去自助區拎多啲蔬菜頂下肚。自助區有冷熱飲品，有幾款果汁汽水，熱朱古力咖啡等等，小食有泡菜、玉子（好難食）、沙律（自己落場嗰隻好食d)，仲有幾款甜品，同埋自己整嘅雪糕機，雪糕有西瓜同埋牛奶兩隻味，千祈唔好食西瓜味，一個字伏！仲有牛角飯係可以自己任食嘅，呢個算係最好食。埋單平均每人一百二十幾蚊，性價比一般。如果係咁我情願食嗰啲漢陽苑或者校長燒肉放題。仲有，雖然服務員態度非常好，尤其門口帶位嘅同埋收碟嘅員工，佢哋有收碟專員又真係幾好，但係衛生情況一般，我張枱有螞蟻喺爐邊行嚟行去。