和花亭壽司 (已結業)

又一間以手握壽司為賣點既廻轉壽司店，照例成為城中新貴食店。六點半到達，已見有人等位。以為要排隊等位，點知去到又有籌可以拎，大概係有籌既就可以係店內既櫈坐住等，其他既就要排隊等，等左30分鐘就可以入座。壽司既款式比峰多，但價錢又相對地貴$10碟左右。帶子壽司一碟$35，但味道鮮甜，口感亦相當好。牡丹蝦壽司賣$45，應該係廻轉壽司中最好味既，夠爽脆，鮮味亦十足。劍魚腩壽司$20碟，入口好濃魚油味，唔錯。特色既檸檬鹽味靖魚壽司同梅子鯛魚幾特別，口味都清新。而鱈場蟹湯$35，入口好甜，味精實有架喇，但隻蟹都幾多肉同甜。可惜七點幾已經大吞拿魚腩同中吞拿腩都賣晒，都幾誇張。久唔久就會由師傅開咪公布限定推介，多數得幾份，要食客舉手示意要唔要，感覺好似拍賣會，作為gimmick都幾夠啅頭。每個坐位前要有個掣，按下可以呼喚待應或者師傳，但發覺無乜人留意，變相又係要招手叫人，而且只用口頭落order，無用紙作記錄，師傅好容易忘記客人既order，我試過三次落order都係要再追先有。埋單兩個人要$480，比峰壽司貴，但食落又差唔多質素，所以唔會成為首選。