飼說 (已結業)

銅鑼灣雖然西餐唔少，但通常都好睇唔好味，裝修靚但食物一般又收得貴嘅實在太多。今日同行嘅朋友對食飯嘅環境都幾在意，上網見依間餐廳嘅裝修幾靚，菜式又幾特別，就抱住可能會中伏嘅心態一試。我哋叫咗一個牛肉漢堡扒炒飯，虎蝦蕃茄意粉同士多啤梨蜂蜜雞翼。首先依個漢堡扒芝士炒飯賣相好吸引，而且漢堡扒煎得好香脆。但咬落又有肉汁。炒飯嘅醬汁幾特別，咸中帶點甜。真係食到清晒碟。唯一唔好就係芝士未通完全融化。虎蝦意粉就真係唔特別好味，而且蝦有啲梅，不過佢個蕃茄汁就真係煮融蕃茄煮出黎，有誠意分。而我都幾欣賞佢個雞翼，味道好特別，同埋個甜味好自然，外皮烤得脆脆，而且整成單邊，食起上黎就比較方便。最後都有叫兩杯沙冰飲品，藍莓沙冰同香蕉沙冰。味道唔算特別。整體黎講餐廳嘅環境真係好有復古嘅味道，而且空間好大，食飯傾計好自在。食物嘅選擇唔多，但菜式獨特。不過價格真係唔平，叫埋野飲都要300左右一位，同埋有樣唔好嘅係，唔知咩原因，我哋黎食嘅時候好多食材都話冇晒，所以有啲想試嘅菜式其實冇試到，有啲無奈。